“သင်တိုင်းတာနိုင်တဲ့ အရာတွေကိုသာ ထိန်းချုပ်နိုင်စွမ်းရှိတယ်။” ဆိုတဲ့ စကားတစ်ခုရှိပါတယ်။

~ စီးပွားရေးမှာ အရောင်းပိုင်း၊ မားကက်တင်းပိုင်းကို ဦးဆောင်နေရတဲ့လူတွေဟာ ကိုယ့်လုပ်ငန်းကို နောက်တစ်ဆင့် ဆက်သွားဖို့အတွက် ဗျူဟာတွေရေးဆွဲရမယ်။ ဗျူဟာ၊ စီမံချက်ရေးဆွဲတဲ့အခါမှာ မပါမဖြစ်တစ်ခုက တိုင်းတာရေး စနစ်၊ ကိုယ့်လုပ်ငန်း အခြေအနေကို သေချာသိနိုင်မယ့် ပေတံတွေဖြစ်ပါတယ်။

~ ဒီပိုစ့်မှာ Better Version ပရိတ်သတ်တွေအတွက် အရောင်းပိုင်း၊ မားကက်တင်းပိုင်းအတွက် တိုင်းတာရေး စနစ်လုပ်နိုင်ဖို့အတွက် အဆင့်တွေကို ပြောပြပေးသွားမှာ ဖြစ်ပါတယ်။

(အဆင့် ၁ ) လုပ်ငန်းရဲ့ ရည်မှန်းချက်၊ ပန်းတိုင်တွေကို အရင်ရှင်းလင်းအောင်လုပ်ပါ။

ငါ့လုပ်ငန်းကို ဘယ်အနေအထားမျိုးထိ သွားမှာလဲ၊ ဘယ်လောက်အဆင့်ရှိတဲ့ လုပ်ငန်းဖြစ်ချင်တာလဲဆိုတာ အရင်ရှင်းလင်းရမယ်။ ဒီနေရာမှာ ရောင်းအား၊ ဈေးကွက်ထိုးဖောက်နိုင်စွမ်းနဲ့ ဈေးကွက်ဝေစု၊ ဖောက်သည် အရေအတွက်ကနေ ကိုယ့်လုပ်ငန်းအကြောင်းကို သိရှိနားလည် လက်ခံနိုင်တဲ့ အရေအတွက် ဆိုတာမျိုးတွေ ပါဝင်နိုင်တယ်။

(အဆင့် ၂) အရောင်း နဲ့ မားကက်တင်းအတွက် ရှင်းလင်းတဲ့ ပန်းတိုင်တွေ ချမှတ်ပါ။

ရည်မှန်းချက်ပန်းတိုင်တွေကို အသေးစိတ်ပြန်လုပ်ဖို့လိုမယ်။ လုပ်ငန်းရဲ့ ရည်ရွယ်ချက်ဟာ ဈေးကွက်ဝေစု ၃၀% တိုးလာရေးဆိုရင် မားကက်တင်းပိုင်း အရောင်းပိုင်းမှာ ဝယ်သူဘယ်နှစ်ယောက် တိုးလာရမယ်။ ဝယ်သူတစ်ယောက်ရဖို့အတွက် သုံးတဲ့ မားကက်တင်းစရိတ် ဘယ်လောက် လျော့လာရမယ် ဆိုတာမျိုးတွေ စဥ်းစားနိုင်ပါတယ်။

(အဆင့် ၃) တိုင်းတာရေး စနစ်၊ ပေတံကို သတ်မှတ်ပါ။

ဒီနေရာမှာပိုပြီးတိကျ ပြတ်သားရှင်းလင်းတဲ့ ရည်မှန်းချက်တွေ ဖြစ်ဖို့လိုလာပြီ။ ကိုယ့်လုပ်ငန်းက တိုးတက်နေလား။ ဆုတ်ယုတ်နေလားဆိုတာကို ကြည့်လိုက်တာနဲ့ တန်းသိနိုင်မယ့် ပေတံမျိုး၊ တိုင်းတာရေးသတ်မှတ်ချက်တွေ လုပ်ရမယ်။

ဥပမာ အနေနဲ့-

အရောင်းပိုင်းအတွက်

_ အပတ်စဥ်၊ လစဥ်၊ နှစ်စဥ်မှာ အရောင်းဘယ်လောက်ရရမယ်။ (Revenue)

_  အရောင်းတိုးတက်လာမှု ဘယ်လောက် % ရှိရမယ်။ (Growth %)

_ ဝယ်သူတစ်ယောက်ဖြစ်လာဖို့ သုံးရတဲ့စရိတ် ဘယ်လောက်ပဲ ရှိရမယ်။ (Cost Per Customer)

_ ဝယ်သူတစ်ယောက်ကနေ ရရှိမယ့် အရောင်းပမာဏ ဘယ်လောက်ရှိရမယ်။ (Avg. Sales Volume)

_  စုံစမ်းသူကနေ ဝယ်သူဖြစ်သွားအောင် ရောင်းနိုင်တဲ့ % ဘယ်လောက်ရှိရမယ်။ (Conversion Rate)

_  ရောင်းချတဲ့နေရာမှာ ကြာချိန်ဘယ်လောက်ဘဲ ဖြစ်ရမယ် စသည်ဖြင့် ထားနိုင်ပါတယ်။

မားကက်တင်းအတွက် မပြောခင်မှာ သတိပေးချင်တာတစ်ခုကတော့ တိုင်းတာရေး သတ်မှတ်ချက်ဆိုတာ လုပ်ငန်း၊ ဈေးကွက် ရဲ့ သဘောသဘာဝပေါ်မှာ အခြေခံပြီး ထားရမယ်။ သူများထားတဲ့ ပေတံတိုင်းဟာ ကိုယ့်လုပ်ငန်းအတွက် ကိုက်ချင်မှ ကိုက်မယ်ဆိုတာ နားလည်ထားရပါမယ်။

ဒါ့အပြင် အရောင်းနဲ့ မားကက်တင်းဟာ တွဲဆက်နေတဲ့ သဘောရှိတဲ့အတွက်ကြောင့် ဌာနအလိုက်မှာ တူညီနေတဲ့ ပေတံတွေရှိနေနိုင်ပါတယ်။

မားကက်တင်းအတွက်ဆိုရင်

-----------------

✅ Website Visitor
✅ Click-Through-Rate
✅ CPC (Cost Per Click)
✅ CPR (Cost Per Results)

✅ Engagement

✅ Follower

✅ No of Inquiry

✅ Cost Per Inquiry စသည်ဖြင့် သတ်မှတ်ပြီးထားနိုင်ပါတယ်။

(အဆင့် ၄) ချမှတ်ထားတဲ့ အချက်အလက်တွေကို ပြန်ပြင်ဆင်ရမယ်။ နှိုင်းယှဥ်ချိန်ထိုးပြီး ပြင်ဆင်ပါ။

ဒီအဆင့်က အရေးကြီးတယ်။ တခါတလေမှာ ကိုယ်ရည်မှန်းချက် ပန်းတိုင်၊ တိုင်းတာရေးတွေက သဘာဝမကျတာ၊ ဖြစ်သင့်တာထက်ကို အများကြီးပိုနေတာ ဖြစ်နေတတ်တယ်။  ဒါမှမဟုတ်

တကယ့်ဖြစ်သင့်တာထက်နည်းနေတာမျိုးတွေလဲ ဖြစ်တတ်သေးတယ်။

လက်ရှိ ကိုယ့်ရုံးမှာ ရှိတဲ့အချက်အလက်တွေကို အခြေခံပါ။ ကိုယ့်လုပ်ငန်းက တစ်လ သိန်း ၁၀၀ ဖိုးလောက် ပုံမှန်ရှိလေ့ရှိတာကို ၃၀၀ လောက်ထားထားမိတာမျိုး။ ပြိုင်ဘက်တွေ အများကြီးပိုဝင်လာတယ်၊ ဈေးကွက်အရွယ်အစားက ကြီးမလာတော့တာကို တခြားနည်းလမ်းတွေ ပြောင်မြောက်အောင် မစဥ်းစားထားဘဲ အရင်လို၊ အရင်ကထက် ရည်မှန်းချက်ကို ပိုချထားမိတာမျိုးတွေ ဖြစ်တတ်ပါတယ်။ ဈေးကွက်ကိုလဲ လေ့လာပါ။ တိကျသေချာဖို့အတွက် ပြန်ပြင်ဆင်ပါ။

(အဆင့် ၅) တာဝန် နှင့် အရင်းအမြစ် ခွဲဝေပေးပါ။

ချမှတ်ထားတဲ့ ရည်မှန်းချက်ကို ရဖို့အတွက်ကို ဘယ်သူတွေကို ဘယ်တာဝန်တွေယူကြမလဲ။ ဘယ်သူက ဘယ်အလုပ်အတွက် ဝာာဝန်ခံမှာလဲ။ ရှိနေတဲ့ အရင်းအမြစ်တွေ လူ၊ ငွေ၊ အချိန်၊ စက်၊ ကွန်ယက်၊ အတွေ့အကြုံစတာတွေကို ဘယ်လို စီမံခန့်ခွဲကြမလဲ။ ခွဲဝေသုံးစွဲမလဲဆိုတာ ဆုံးဖြတ်ပါ။ ဥပမာ။ ။ ဘတ်ဂျတ် သိန်း ၁၀၀ ရှိတယ်ဆိုပါတော့ ကြော်ငြာအတွက် ဘယ်လောက်သုံးမယ်။ ခရီးစရိတ်အတွက် ဘယ်လောက်သုံးမယ်။ လူဆိုပါတော့ ဘယ်ဌာနမှာ လူဘယ်လောက်ခန့်မယ်။ ဘယ်လောက် အတွေ့အကြုံ အရည်အချင်းရှိတဲ့လူတွေခန့်မယ်။ စသည်ဖြင့် ခွဲဝေပါ။

(အဆင့် ၆) အချက်အလက်တွေ ဘယ်လိုစုဆောင်းမလဲ။ ဘယ်လို သုံးသပ်မလဲ။

ကိုယ့်ရည်မှန်းချက်တွေ ရနေလား။ မရနေဘူးလား။ ဘယ်အခြေအနေတွေဖြစ်နေသလဲ။ အချိန်နဲ့ တပြေးညီသိနေရအောင် လုပ်ထားဖို့လိုပါတယ်။ တချို့က တစ်လ တစ်ခေါက်လောက်မှ ကြည့်ကြတယ်။ တကယ် ဖြစ်သင့်တာကတော့ အချက်အလက်တွေကို အချိန်နဲ့တပြေးညီ သိနေအောင်လုပ်သင့်တယ်။ နည်းပညာ အကူအညီယူသင့်ရင် ယူရမယ်။

ဒါတွေ စဥ်းစားပါ။

(က) ဘယ်လို ဆုံးဖြတ်ချက်တွေ ချဖို့လိုသလဲ။

(ခ) ဒီဆုံးဖြတ်ချက်တွေချမှတ်ဖို့ ဘယ်လို အချက်အလက်တွေလိုမလဲ။

(ဂ) လိုအပ်တဲ့အချက်အလက်တွေကို ဘယ်ကနေရမလဲ။ ဘယ်သူတွေကကောက်မလဲ။ ဘယ်သူက စာရင်းသွင်းမှာလဲ။ ဘယ်လိုနည်းလမ်းနဲ့ သွင်းမှာလဲ။ ဘယ်လောက်ကြာရင် သွင်းမှာလဲစသည်ဖြင့် အသေးစိတ် စဥ်းစား စီစဥ်ပါ။

(ဃ) ဘယ်လို သုံးသပ်မှာလဲ။ ဘယ် ဆော့ဝဲလ် တွေသုံးကြမလဲ။ ဘယ်သူက ပြင်ဆင်ပေးမှာလဲ။ အစီရင်ခံစာကို ဘယ်တော့တစ်ခေါက် သုံးသပ်ကြမလဲ။

(အဆင့် ၇) ပုံမှန် ရလဒ်တွေကို စောင့်ကြည့်အကဲဖြတ်ပါ။
 

(အဆင့် ၈) နည်းလမ်းတွေကို ပြန်ပြင်ဆင်ပါ။

ထွက်လာတဲ့ရလဒ်တွေကို စောင့်ကြည့်အကဲဖြတ်ပြီးရင် ပြင်ဆင်သင့်တာတွေကို ပြင်ဆင်ပါ။ ဈေးကွက်ထဲမှာ ဈေးနှုန်းနဲ့ ပတ်သက်ပြီး အဓိက ပြောနေကြသလား။ အရောင်းသမားတွေကို မှန်းထားသလောက် မရောင်းကြဘူးလား။ သင်တန်းပေးဖို့လိုနေတာလား။ ပြိုင်ဘက်တွေများလာတာလား။ ပစ္စည်း ပြသနာလား။ စသည့်ဖြင့် ဘာကြောင့် မှန်းထားသလောက် မရနေလဲ ဆိုတာ အဖြေရှာပြီး လုပ်နည်းကိုင်နည်းတွေကို ပြောင်းပါ။

ဒီမှာ လိုချင်သလောက် မရမှဘဲ ပြောင်းတာပြင်တာကို စဥ်းစားကြတာများတယ်။ တကယ်တော့ ကိုယ်မှန်းထားသလောက်ရနေရင်လဲ ဘာကြောင့်ရနေတာလဲ။ ဈေးကွက်ကျယ်လာတာလား။ ထားထားတဲ့ ရည်မှန်းချက်ကို ဖြစ်သင့်တာထက် နှိမ့်နေတာလား။ တကယ်ဘဲကိုယ့်လုပ်ငန်းကို လူကြိုက်များနေလို့လား။ စသည်ဖြင့် ကောင်းလာရင်လဲကောင်းလာရတဲ့ အကြောင်းအရင်း၊ မကောင်းရင်လဲ မကောင်းရတဲ့ အကြောင်းအရင်းကို ရှာပါ။ ဒါဟာ နောက်ပိုင်းဗျူဟာတွေအတွက် အများကြီး အထောက်အပံပေးပါတယ်။

(အဆင့် ၉) တင်ပြပါ။ မျှဝေပါ။

ထွက်လာတဲ့ ရလဒ်တွေကို သိသင့်သိထိုက်တဲ့ လူတွေကို ဖတ်ချင်အောင်၊ ကြည့်ချင်အောင် ပြင်ဆင်ပြီး မျှဝေပါ။ ကိုယ့်ထင်မြင်ချက်တွေကို အချက်အလက်အခြေခံပြီး တင်ပြဖို့လိုသလို တခြားလူတွေရဲ့ ထင်မြင်ချက်တွေ၊ ခံစားချက်တွေ၊ မြင်ပြင် အတွေ့အကြုံတွေကို နားထောင်ပါ။

(အဆင့် ၁၀) စဥ်ဆက်မပြတ် တိုးတက်မှု

ကိုယ်ပြင်ထားတဲ့ ပုံစံတွေဟာ အချိန်တိုင်း အဆင်ပြေချင်မှ ပြေမယ်။ ဈေးကွက်ပြောင်းသွားရင်၊ စီးပွားရေး အသိုက်အဝန်းထဲမှာ အပြောင်းအလဲတွေဖြစ်လာရင်၊ ကိုယ့်လုပ်ငန်းခွင်ထဲမှာပါ အပြောင်းအလဲတွေ ဖြစ်နေမယ်။ ကိုယ်တိုင် ဒီအပြောင်းအလဲမှာ လိုက်စီးမျောနိုင်အောင် စဥ်ဆက်မပြတ် တိုးတက်မှုကို ဦးတည်ပါ။

ဒီအဆင့်တွေကို သေချာလုပ်ဆောင်သွားမယ်ဆိုရင် အရောင်းပိုင်း၊ မားကက်တင်းပိုင်းကို အရင်ကထက်ပိုပြီးတော့ ဦးဆောင် စီမံခန့်ခွဲနိုင်လာမှာ ဖြစ်ပါတယ်။

မားကက်တင်း ဗျူဟာတွေ လေ့လာချင်ရင် – Practical Marketing Strategies သင်တန်းတက်ပါ။

အရောင်းပိုင်းအတွက်ဆိုရင် – “ရောင်းချင်တာ..ရောင်း” စာအုပ်နှင့် Sales Shark သင်တန်းတက်ပါ။

အသေးစိတ်ကို Better Version Page Messenger မှာ စုံစမ်းနိုင်ပါတယ်။

နောက်တစ်ဆင့် တက်လှမ်းနိုင်ဖို့အတွက် Better Version ရှိပါတယ်။

#betterversion #blog #website