ဈေးနှုန်းက လုပ်ငန်းတစ်ခု ဈေးကွက်ထဲမှာ ဘယ်လိုအနေအထားနဲ့ရပ်တည်နေလဲ ဆိုတာရဲ့ အဓိကအချက်ဖြစ်ပြီး ဝင်ငွေအပေါ်မှာ တိုက်ရိုက်သက်ရောက်မှုရှိပါတယ်။ သေချာစဥ်းစားပြီးသတ်မှတ်ထားတဲ့ ဈေးနှုန်းတွေက သုံးစွဲသူတွေကိုဆွဲဆောင်နိုင်ဖို့နဲ့ အမြတ်အစွန်းရနိုင်ဖို့ စတာတွေအတွက် အချိန်အဆမျှတနေမှာဖြစ်ပြီး ဝင်ငွေများများ ရှာနိုင်မှာဖြစ်ပါတယ်။

ဈေးနှုန်းသတ်မှတ်ခြင်း ဗျူဟာက လုပ်ငန်းအတွက် အဓိကကျတဲ့အချက်ဖြစ်ပြီး လုပ်ငန်းတစ်ခုရဲ့ အောင်မြင်မှုမှာ အဓိက အခန်းကဏ္ဍကနေ ပါဝင်ပါတယ်။လုပ်ငန်းရဲ့ ရည်မှန်းချက်တွေ၊ အဓိကပစ်မှတ်ထားတဲ့ ဈေးကွက်၊ ထုတ်ကုန်နဲ့ ဝန်ဆောင်မှုတွေရဲ့ သဘောသဘာဝပေါ် အခြေခံပြီး ဈေးနှုန်းသတ်မှတ်တဲ့နည်းလမ်း များစွာရှိပါတယ်။ ဒီမှာတော့ ဈေးနှုန်းသတ်မှတ်တဲ့အခါ သုံးနိုင်မယ့်နည်းလမ်း ၅ မျိုးကို ပြောပြပေးသွားပါမယ်။
 

𝐂𝐨𝐦𝐩𝐞𝐭𝐢𝐭𝐢𝐯𝐞 𝐏𝐫𝐢𝐜𝐢𝐧𝐠

အပြိုင်ဈေးနှုန်းသတ်မှတ်ခြင်းဆိုတာက ပုံစံတူ ထုတ်ကုန်၊ ဝန်ဆောင်မှုကို လုပ်ငန်းတူတွေက သတ်မှတ်တဲ့ ဈေးနှုန်းတွေပေါ်မူတည်ပြီး ဈေးနှုန်းသတ်မှတ်ခြင်းကိုဆိုလိုပါတယ်။ သူ့ရဲ့ရည်ရွယ်ချက်ကတော့ ဈေးကွက်နဲ့ လိုက်လျောညီထွေမှုရှိစေဖို့နဲ့ ပြိုင်ဘက်တွေနဲ့နှိုင်းယှဥ်တဲ့အခါ ဈေးနှုန်းပေါ်အခြေခံပြီး ဝယ်သူတွေကို ဆွဲဆောင်နိုင်ဖို့ဖြစ်ပါတယ်။လုပ်ငန်းတွေမှာ ထုတ်ကုန်၊ ဝန်ဆောင်မှုအတွက် ဈေးနှုန်းသတ်မှတ်တဲ့အခါ ၃ မျိုး ရွေးချယ်သတ်မှတ်လို့ရတယ်။

-လုပ်ငန်းတူတွေထက် ဈေးများပြီးသတ်မှတ်ခြင်း
-လုပ်ငန်းတူတွေထက် ဈေးနည်းပြီးသတ်မှတ်ခြင်း
-လုပ်ငန်းတူတွေနဲ့ဈေးနှုန်းတူညီစွာသတ်မှတ်ခြင်း စသဖြင့် လုပ်ငန်းရဲ့သွားချင်တဲ့ ရည်ရွယ်ချက်(Goals) ပေါ်မူတည်ပြီး သတ်မှတ်လို့ရပါတယ်။

အဲ့ဒီထဲကမှ ဈေးပိုများပြီးသတ်မှတ်ချင်တယ်ဆိုရင်တော့ အများနဲ့မတူအောင် အပိုဝန်ဆောင်မှုပိုင်းတွေ ကိုလုပ်ဆောင်ရပါမယ်။ ဈေးနှုန်းနဲ့ယှဥ်ပြိုင်တာမျိုးကိုမလိုချင်ဘဲ ပရီမီယံဈေးနှုန်းကို သတ်မှတ်ချင်တယ် ဆိုရင်တော့ လုပ်ငန်းအရည်အသွေးပိုင်းမှာ သူများထက်သာနေအောင် ပြင်ဆင်ထားဖို့လိုအပ်ပါတယ်။

𝐏𝐞𝐧𝐞𝐭𝐫𝐚𝐭𝐢𝐨𝐧 𝐏𝐫𝐢𝐜𝐢𝐧𝐠

Penetration Pricing ဆိုတာက ထုတ်ကုန်၊ဝန်ဆောင်မှုအသစ်တွေကို အစပိုင်းမှာ ဈေးနှုန်းချထားပြီး သုံးစွဲသူတွေရအောင်ဆွဲဆောင်ဖို့ အသုံးပြုတဲ့နည်းလမ်းပဲဖြစ်ပါတယ်။ ဈေးနှုန်းချထားတာက ထုတ်ကုန်၊ ဝန်ဆောင်မှုအသစ်တွေအတွက် ဈေးကွက်ထဲကို မြန်မြန်ထိုးဖောက်စေနိုင်ပြီး လုပ်ငန်းတူပြိုင်ဘက်တွေနဲ့ ယှဥ်ပြိုင်ရတာမျိုးမရှိဘဲ သုံးစွဲသူတွေကို ဆွဲဆောင်နိုင်ဖို့ အထောက်အကူဖြစ်စေပါတယ်။
ဒီနည်းလမ်းကို သုံးရခြင်းရဲ့ ရည်ရွယ်ချက်ကတော့ သုံးစွဲသူတွေအနေနဲ့ ကုန်ပစ္စည်းဝန်ဆောင်မှုအသစ်တွေကို စမ်းသုံးလာဖို့ဆွဲဆောင်တာဖြစ်ပြီး ဈေးနှုန်းကပုံမှန်အနေအထားကိုပြန်ရောက်သွားတဲ့အခါ ကိုယ့်ဝယ်သူတွေကို နဂိုအတိုင်း ဆက်လက်ထိန်းသိမ်းထားနိုင်ဖို့ဖြစ်ပါတယ်။
ဥပမာအားဖြင့် Online Website တွေကနေ ဝယ်ပြီးအသုံးမပြုခင် free 1 month အသုံးပြုခွင့်ပေးထားတာမျိုးကိုဆိုလိုပါတယ်။ ဒီနည်းလမ်းကတော့ ဈေးကွက်မှာအမြန်ဆုံးနည်းနဲ့ နေရာရဖို့အတွက် အစပိုင်းမှာ ပုံမှန်ထက် ဈေးနှုန်းလျှော့ပေးထားတာမျိုး ဖြစ်ပါတယ်။ အရင်ဆုံးသုံးစွဲသူ များများဆွဲဆောင်ပြီးတော့မှ နောက်ပိုင်းမှာ ဖြည်းဖြည်းချင်း ဈေးတက်လာအောင်လုပ်တဲ့ နည်းလမ်းဖြစ်ပါတယ်။

𝐒𝐤𝐢𝐦𝐦𝐢𝐧𝐠 𝐏𝐫𝐢𝐜𝐢𝐧𝐠

ထုတ်ကုန်အသစ်တစ်ခုကို အစပိုင်းမှာ ဈေးနှုန်းမြင့်မြင့် သတ်မှတ်ထားတာဖြစ်ပြီး အချိန်ကြာလာတဲ့အမျှ တဖြည်းဖြည်း လျှော့လာတာမျိုးဖြစ်ပါတယ်။ ဒီနည်းလမ်းကတော့ ကုန်ပစ္စည်းအသစ်တွေ ၊ပရီမီယံ ထုတ်ကုန်တွေအတွက် သုံးစွဲသူစရှာတဲ့အချိန်မှာ အသုံးပြုကြတာဖြစ်ပါတယ်။တိုးမြှင့်ထားတဲ့ဈေးနဲ့ ပထမဆုံးသုံးစွဲသူတွေက စိတ်ကျေနပ်အဆင်ပြေသွားကြတဲ့အခါ နောက်ထပ် ဈေးနှုန်း ဦးစားပေးစဥ်းစားတဲ့ သုံးစွဲသူအသစ်တွေကိုဆွဲဆောင်ဖို့ တဖြည်းဖြည်းနဲ့ဈေးလျှော့ပြီး ထပ်ရှာတဲ့ နည်းလမ်းပဲဖြစ်ပါတယ်။

ဒီနည်းလမ်းရဲ့ ရည်မှန်းချက်ကတော့ ပြိုင်ဘက်တွေဈေးကွက်ထဲဝင်မလာခင်၊ ဝယ်လိုအားတွေတက်နေချိန်မှာ Revenue (အကျိုးအမြတ်) ရသလောက်ယူထားခြင်းပဲဖြစ်ပါတယ်။ဒီနည်းလမ်းကိုတော့ နည်းပညာပိုင်းဆိုင်ရာ Company တွေ၊ ဈေးကွက်ထဲကို ပစ္စည်းသစ်တင်ဖို့လုပ်တဲ့အချိန်မှာအသုံးပြုကြပါတယ်။သုံးစွဲသူတွေက ဒီထုတ်ကုန်အသစ်ကို အရင်ဆုံးသုံးစွဲခွင့်ရဖို့အတွက် ပရီမီယံဈေးနှုန်းကို ပေးဆောင်ကြမှာဖြစ်ပါတယ်။ထင်သာမြင်သာ ဥပမာ ပေးရမယ်ဆိုရင်တော့ (iPhone )ကို မြင်ကြည့်လို့ရပါတယ်။

𝐃𝐲𝐧𝐚𝐦𝐢𝐜 𝐏𝐫𝐢𝐜𝐢𝐧𝐠

ဝယ်လိုအား၊ ရောင်းလိုအား သို့မဟုတ် ဈေးကွက်အခြေအနေစတဲ့ အကြောင်းအရင်း အမျိုးမျိုးပေါ်မူတည်ပြီး အချိန်နဲ့တပြေးညီ ဈေးနှုန်းတွေကိုချိန်ညှိပြီး သတ်မှတ်တဲ့နည်း ဖြစ်ပါတယ်။သုံးစွဲသူဘက်က Demand များရင်များသလို ဈေးတွေကိုချိန်ညှိပြီး ပြောင်းလဲသတ်မှတ်တာမျိုးဖြစ်ပါတယ်။ ဒီနည်းလမ်းကိုတော့ ခရီးသွားလုပ်ငန်းတွေမှာ အများဆုံးတွေ့ရပါတယ်။ ဥပမာ- ဟိုတယ်ပိုင်းတွေမှာဆိုရင် ခရီးသွားရာသီ ရောက်တဲ့အခါ အခန်းဈေးတွေပိုတက်လာတာမျိုး ကြုံဖူးကြမှာပါ။ဒါက ပုံမှန်အချိန်တွေထက် အဲ့လိုခရီးသွားရာသီတွေမှာ လူတွေက ဟိုတယ်တွေကို စိတ်ဝင်စားတာ၊ ပိုပြီး အသုံးပြုကြတာကြောင့်ပဲ ဖြစ်ပါတယ်။

𝐁𝐮𝐧𝐝𝐥𝐞 𝐏𝐫𝐢𝐜𝐢𝐧𝐠 (အတွဲလိုက်ဈေးနှုန်းသတ်မှတ်ခြင်း)

တစ်ခုထက်ပိုတဲ့ ကုန်ပစ္စည်း၊ ဝန်ဆောင်မှုတွေကို Package အလိုက်လုပ်ထားပြီး တစ်ခုချင်းခွဲဝယ်တဲ့အခါ ပေးရတဲ့ဈေးထက် ပိုသက်သာတဲ့ဈေးနဲ့ ကမ်းလှမ်းတာမျိုးဖြစ်ပါတယ်။ ဒီနည်းလမ်းကတော့ သုံးစွဲသူတွေကို ပစ္စည်းတွေပိုများများဝယ်စေချင်တဲ့အခါ အသုံးပြုတဲ့ နည်းလမ်းဖြစ်ပါတယ်။ သုံးစွဲသူတွေအနေနဲ့ သုံးလိုက်ရတဲ့ ငွေပမာဏအပေါ် အကျိုးရှိတယ်လို့ သတ်မှတ်သွားစေမှာဖြစ်ပြီး ကုန်ကျစရိတ်နည်းသွားတာမို့ သုံးစွဲသူတွေအကြိုက်တွေ့စေမယ့်နည်းလမ်းပါ။

ဈေးကွက်အခြေအနေ၊ ထုတ်ကုန်ရဲ့ အခြေအနေ( product life cycle) ၊လုပ်ငန်းတူပြိုင်ဘက်တွေရဲ့ အခြေအနေတွေပေါ် မူတည်ပြီးသတ်မှတ်ရတာဖြစ်လို့ နည်းလမ်းတစ်ခုချင်းစီရဲ့ ထိရောက်မှုက ထုတ်ကုန်ရဲ့သဘောသဘာဝ၊ ကိုယ်အဓိကထားတဲ့ သုံးစွဲသူတွေ၊ လုပ်ငန်းတစ်ခုလုံးရဲ့ ရည်မှန်းချက် အစရှိတဲ့ အချက်တွေပေါ် မူတည်ပါတယ်။နည်းလမ်းတိုင်းက လုပ်ငန်းတိုင်းအတွက် အဆင်မပြေနိုင်တာမို့ ကိုယ်နဲ့အကိုက်ညီဆုံးနည်းကို ရွေးချယ်အသုံးပြုနိုင်ပါတယ်။

Better Version Institute  မှ မိမိလုပ်ငန်းများအတွက် အသုံးဝင်မယ့် 𝐒𝐚𝐥𝐞𝐬, 𝐌𝐚𝐫𝐤𝐞𝐭𝐢𝐧𝐠, 𝐍𝐞𝐠𝐨𝐭𝐢𝐚𝐭𝐢𝐨𝐧 & 𝐂𝐮𝐬𝐭𝐨𝐦𝐞𝐫 သင်တန်းများကို တက်ရောက်နိုင်ဖို့အတွက် 𝟎𝟗 𝟖𝟖𝟎 𝟗𝟎𝟐 𝟓𝟓𝟖 (သို့မဟုတ်) 𝐌𝐞𝐬𝐬𝐚𝐠𝐞 𝐁𝐨𝐱 တွင် စုံစမ်းမေးမြန်းနိုင်ပါတယ်။

#betterversion #betterversionteam#sales