အရင်ဆုံး လူတွေက ဘာကို အရင်ဆုံး တွေးပေး၊ စိတ်ဝင်စားပေးလဲ သိကြလား...
ကိုယ့်ကိုယ်ကို အရင်ဆုံးကြည့်တဲ့လူတွေရှိမယ်... နောက်မှ ကိုယ့်မိသားစု၊ ချစ်သူ၊ ပိုင်ဆိုင်တဲ့ပစ္စည်း၊ ဥစ္စာ တွေကို တွေးပေးမယ်။ နောက်တစ်ဆင့်မှ သူငယ်ချင်း၊ အသိမိတ်ဆွေ၊ လူမျိုး၊ နိုင်ငံ ကို တွေးပေးကြတယ်။ “ ဒါ ငါ့မိသားစု၊ ဒါ ငါ့သူငယ်ချင်း၊ ဒါ ငါ့ပစ္စည်း “ စသဖြင့် “ဒါ… ငါ” စာလုံးလေးတွေ တပ်ထားကြတယ်။
ဒါပေမယ့် “ဒါ… ငါ” တွေရဲ့ အပြင်ဘက်ကိုရောက်သွားပြီဆိုရင် ကိုယ်နဲ့ မသက်ဆိုင်တဲ့ အရာတွေလို သတ်မှတ်လိုက်ပြီး ဂရုမစိုက်ကြတော့ပါဘူး။
ဒါကြောင့် လူတွေက ကိုယ်နဲ့ သက်ဆိုင်တယ်၊ ကိုယ်ပိုင်တယ်လို့ ခံစားရတဲ့ အရာတွေကို ပိုပြီး တန်ဖိုးထားတယ်။ ကာကွယ်ကြတယ်။ ဒီအရာတွေက ကိုယ်ပိုင်အရာတွေဖြစ်တဲ့အတွက် ပိုပြီးတန်ဖိုးမြင့်တယ်လို့ သတ်မှတ်တဲ့ ဘက်လိုက်မှု (Biases) တွေရှိကြတယ်။ ဒီလို ဘက်လိုက်မှုဖြစ်ပေါ်လာခြင်းကို Endowment Effect လို့ခေါ်ပါတယ်။
ဥပမာ - မိဘတွေက ကိုယ့်သားသမီးကိုပဲ ပိုတော်တယ်လို့ ထင်တာမျိုးပေ့ါ။
------------------
ဒီ Endowment Effect နဲ့ ချိတ်ဆက်နေတာကတော့ ဆုံးရှုံးရမှာ ကြောက်တဲ့ အကြောက်တရား (Fear Aversion) ပဲ ဖြစ်ပါတယ်။ လူတွေက ကိုယ်ပိုင်တဲ့အရာဆိုရင် လက်လွှတ်ရမှာ ကြောက်တယ်၊ ဆုံးရှုံးရမှာကြောက်တယ်တဲ့ အကြောက်တရားတွေရှိကြတယ်။ ရယူလိုမှုထက် ဆုံးရှုံးရမှာကြောက်တဲ့ ခံစားချက်က ပိုပြင်းထန်တယ်။
ဒီအချက်တွေကို သေချာလေ့လာပြီး သင့်ရဲ့ ကုန်ပစ္စည်းကို ဝယ်သူတွေ ဒီလို ပိုင်ဆိုင်တဲ့ခံစားချက်မျိုး ခံစားလာအောင်၊ ပိုင်ဆိုင်တဲ့ ခံစားချက် ခံစားမိလာအောင် လုပ်ဖို့က လက်ဝယ်ပိုင်ဆိုင်ထားပြီးမှ ခံစားလို့ရအောင် လုပ်လို့ရတာ မဟုတ်ပါဘူး။ မဝယ်ခင် အခိုက်အတန့်မှာလည်း ဖန်တီးလို့ရပါတယ်။ ဘယ်လို နည်းလမ်းတွေနဲ့ ဖန်တီးလို့ရလဲ ဆိုတာကို လေ့လာကြည့်လိုက်ရအောင်။
------------------
စီးပွားရေးလုပ်ငန်းတိုင်းအတွက် စိတ်ပိုင်းဆိုင်ရာ ပိုင်ဆိုင်မှုတစ်ခုကို ဖန်တီးခြင်းက နည်းလမ်းကောင်းတစ်ခုပဲ ဖြစ်ပါတယ်။ ဝယ်သူတွေ ကိုယ့်ရဲ့ ကုန်ပစ္စည်းကို ပိုင်ဆိုင်တဲ့ ခံစားချက်ဖြစ်လာပြီး လက်လွှတ်မခံချင်အောင် လုပ်နိုင်ဖို့အတွက် အများကြီး စဥ်းစားဖို့မလိုအပ်ပါဘူး။ ဒီခံစားချက်ကို အသုံးချဖို့အတွက် အခြေခံနည်းလမ်း (၃)ခု ရှိပါတယ်။
- အခု Digital ခေတ်မှာ စီးပွားရေးတော်တော်များများက Online ကနေတစ်ဆင့် ရောင်းချတာတွေကို လုပ်ကြတဲ့အတွက် ပိုင်ဆိုင်တယ်ဆိုတဲ့ ခံစားချက်ရဖို့ အနည်းငယ်ခက်ခဲပါတယ်။ ဒါကြောင့် သင်အနေနဲ့ လုပ်ရမှာက ကိုယ့်ရဲ့ကုန်ပစ္စည်းဆီက ဘာတွေရနိုင်မလဲ၊ ဝယ်သူတွေအတွက် ဘာတွေ ပိုကောင်းသွားမလဲဆိုတာကို သေသေချာချာ မြင်အောင် ပုံဖော်နိုင်ဖို့ အရေးကြီးပါတယ်။ ပုံဖော်နိုင်ဖို့အတွက် ဝယ်သူကို မေးခွန်းလေးတွေ မေးပြီး ချဥ်းကပ်တဲ့ နည်းလမ်းက အသုံးဝင်ပါတယ်။
- ဝယ်သူကို လျော့စျေးပေးတဲ့အခါ ဒီလျော့စျေးက သူတို့ ပိုင်ဆိုင်ပြီးသားလို့ ခံစားရအောင်လုပ်ပါ။
ဝယ်သူကို လျော့စျေးပေးမယ် (ဒါမှမဟုတ်) အခြားအကျိုးခံစားခွင့်တွေပေးမယ် ဆိုပြီး ကမ်းလှမ်းတဲ့အခါမှာ ဘယ်လောက်လျော့ပေးမယ် ပြောတာထက် ဝယ်သူလက်ထဲ အပိုင်ရရှိပြီသားလိုမျိုး ဖန်တီးထားသင့်ပါတယ်။
ဥပမာ - ဝယ်သူတစ်ဦးတစ်ယောက်ချင်းစီအတွက် လျော့စျေးကူပွန်ပေးတာမျိုးတွေ လုပ်လို့ရပါတယ်။ Grab ၊ Foodpanda တို့လိုမျိုး Promo Code တွေပေးထားတာမျိုးပေ့ါ။ ဒါဆိုရင် ဝယ်သူတွေက ဒီလျော့စျေးကို သူတို့ပိုင်နေပြီး မသုံးလိုက်ရရင် ဆုံးရှုံးသွားသလို ခံစားကြရမှာ ဖြစ်ပါတယ်။ အခြားကုမ္ပဏီကြီးတွေမှာရဲ့ ဝယ်သူတွေကို လျော့စျေးနဲ့ ဘယ်လိုချဥ်းကပ်ကြလဲဆိုတာ ထပ်ပြီး လေ့လာကြည့်လို့ရပါတယ်။
- ဝယ်သူတွေကို မဝယ်ခင်မှာ အမြည်းစမ်းသုံးခွင့်ပေးပါ။
အင်္ကျီဆိုင် တော်တော်များများမှာ မဝယ်ခင် ဘာကြောင့် စမ်းဝတ်စေတာလဲဆိုကို သိပါသလား။ သင်တကယ် ဝတ်ကြည့်လိုက်တဲ့အခါမှာ သင်နဲ့ တော်မတော်၊ လိုက်မလိုက် ဆိုတာကို စမ်းဝတ်ကြည့်တဲ့အချိန်မှာ ခံစားရစေလို့ပါ။ ဒါက စိတ်ပိုင်းဆိုင်ရာဘက်က ကြည့်မယ်ဆိုရင် လူတွေက ဝတ်ကြည့်လိုက်တဲ့အခါ ကိုယ့်ရဲ့ တစ်စိတ်တစ်ပိုင်းလို ခံစားလိုက်ရပြီး ပိုင်ဆိုင်လိုက်သလို ခံစားရတဲ့အတွက် လက်လွှတ်ရမှာ ကြောက်လာတယ်။ ဒီအကြောက်တရားကပဲ သင့်ရဲ့ ပစ္စည်းကို ဝယ်ယူစေဖို့ ဆုံးဖြတ်ချက် ဖြစ်လာတာပါ။ ဒါကြောင့် အစားအသောက်ရောင်းတယ်ဆိုရင် အမြည်းကျွေးဖို့၊ ကားရောင်းတဲ့အခါမှာလည်း အစမ်းပေးမောင်းကြည့်ဖို့၊ Software ရောင်းတာဆိုရင်လည်း အရင်ဆုံး Trial Version ပေးသုံးတာမျိုး လုပ်ပြီးတော့ ချဥ်းကပ်နိုင်ပါတယ်။
------------------
ကိုယ်ပိုင် စီးပွားရေးလုပ်ငန်းလုပ်ကိုင်နေတဲ့သူတွေ၊ လုပ်ငန်းရှင်တွေ အနေနဲ့ စိတ်ပညာအရ ဒီလိုမျိုး လူတွေရဲ့ အတွေးအမြင်၊ အပြုအမူတွေကို လေ့လာထားပြီး နားလည်သဘောပေါက်တဲ့အခါ ကိုယ့်ရဲ့ ကုန်ပစ္စည်းအမှတ်တံဆိပ်(Brand) ကိုပိုပြီး ခိုင်မာစေနိုင်တဲ့အပြင် ရောင်းအားတွေလည်း ပိုများလာစေနိုင်မှာ ဖြစ်ပါတယ်။
——
ဝယ်သူတွေကို အကောင်းဆုံးဝန်ဆောင်မှုတွေ ပေးနိုင်ဖို့ Better Customer Service အတန်းရှိပါတယ်။ သင်တန်းအတွက် အသေးစိတ် သိရှိလိုပါက 09880902558 ကို ဆက်သွယ် စုံစမ်းမေးမြန်းနိုင်ပါတယ်။
နောက်တစ်ဆင့် တက်လှမ်းဖို့အတွက် Better Version ရှိပါတယ်
